صحيفة نبض الشعب الاسبوعيه رئيس التحرير جعفر الخابوري

قصة فيلم فجر الاسلام إنتاج ١٩٧٠
الفيلم ده كان بيخرجه المخرج عاطف سالم وكان بيقوم بأدوار البطولة فيه محمود مرسي وعبد الوارث عسر في دور "الفضل" واللي لعبه بعد كده يحي شاهين ونور الشريف وسعاد حسني قبل ما يتم استبدالهم بالمذيع والممثل عبدالرحمن علي والإعلامية نجوي إبراهيم طب ايه اللي حصل عشان يتغير كل الابطال دول دفعة واحدة بص يا سيدي.

المخرج عاطف سالم كان بدأ تصوير الفيلم ونور الشريف قال في حوار صحفي أنه صور شهر كامل من الفيلم بس فجأة وبدون مقدمات المخرج عاطف سالم يعمل حادثة بعربيته مما أبعده عن إخراج الفيلم هتقولي طب كويس يستنوا المخرج يقوم بالسلامة وبعدين يكملوا هقولك مش في السينما لأن في ديكورات ومناظر اتبنت ومعدات تصوير تم تأجيرها واستوديوهات ودنيا كبيرة سعادتك فالجهة المنتجة عشان تنقذ الموقف أسندت الاخراج للمخرج صلاح ابو سيف اللي اول حاجه عملها بعد ما خد الفيلم قالهم الشهر اللي صوره عاطف سالم ميلزمنيش وأنا لي تصور تاني خالص للفيلم فعمل إيه بقي.

اول حاجة عملها استبعد سعاد حسني ونور الشريف من الفيلم فالناس قالوله حد يستبعد سعاد حسني ده مجرد إسمها هيخلينا نبيع الفيلم قبل ما يتصور قالهم أنا مش شايفها في الدور طب نور الشريف عمل إيه ، نور الشريف غضب جدا وثار خصوصاً أنه كان لسه في بداية مشواره وبيقول مكنتش فاهم أن إختيار الممثلين للأدوار حق أصيل للمخرج المهم صلاح ابو سيف ظل يبحث عن ممثلين شباب بيتكلموا لغة عربية سليمة فلم يجد فأرسل في طلب نور الشريف عشان يرجع للدور تاني فنور قاله مش جاي فالشركة المنتجة قالته أعقل يا ابن الناس ده صلاح أبو سيف برضو يعني رجل الدولة القوي في صناعة السينما وبرضو نور قالهم مش جاي مش هو مشاني وانا مش هرجع قالوله لو مجتش هنخصم باقي مستحقاتك من فيلم السراب قالهم مش عايز قالوله ده انت قلبك جمد يا نور بس ماشي فأحدهم اقترح على صلاح ابو سيف الولد الممثل الشاب اللي كان فيلم ميرامار اللي إسمه عبدالرحمن علي قالهم هاتوه وعمله test كاميرا ونجح ساعتها صلاح ابو سيف قالك ولا الحوجة.

نجوي إبراهيم بقي كانت لسه مخلصة دور وصيفة في فيلم الأرض بالإضافة إلى أنها مذيعة فبتتقن اللغة العربية طب السؤال هنا مأخدش سعاد ليه؟
بعض الأقاويل قالت إن سبب تخليه عن سعاد هو عدم اتقان اللغة العربية وده هيبان بشكل كبير لما تقف قدام ممثلة زي سميحة ايوب أو محمود مرسي بس متقدرش تقول إن الكلام ده صحيح لأن سعاد حسني بعدها بسنين قليلة كانت بطلة الفيلم التاريخي القادسية لصلاح ابو سيف طب ايه السبب في الحقيقة أنا معرفش ومفيش كلام مؤكد علي اي شيء.

طب الحج عبدالوارث عسر الراجل الشيبة الكبارة أحد أعمدة البلاغة في الوسط الفني وأستاذ فنانين كثير في اللغة العربية ليه أطاح به صلاح ابو سيف خارج الفيلم رغم أنه عارف امكانياته كويس (عمل معاه فيلم شباب امرأة) الإجابة اللي قالها صلاح ابو سيف كالتالي :-
يعني أنا اجيب زعيم الكفا ر الأستاذ محمود مرسي بكل ما له من شخصية وهيبة وكاريزما واجيب الطرف الثاني الأستاذ عبدالوارث عسر وفي الفيلم هتلاقي في مشاهد حوارية كتير لإقناع محمود مرسي بالإسلام وصراعات أكثر بين الطرفين في حين أن معظم أدوار الفنان عبدالوارث عسر بتتمحور حول الشخص الضعيف المغلوب علي امره نظرا لتكوينه الجسماني الرقيق وطبيعة صوته فكان المشاهد هيشعر أن كفة الكفا ر اللي بيمثلها محمود مرسي اقوي وارجح من كفة المسلمين اللي كان بيمثلها الفنان عبد الوارث عسر لذلك تم استبدال الفنان عبدالوارث عسر بالفنان يحي شاهين حتي تكون الكفة متساوية.

فيلم فجر الاسلام تم دبلجته لعدة لغات أجنبية أبرزها الانجليزيه.